နှလုံးတစ်ခုန်စာအကွာအဝေးရဲ့ ပုံတူ

၁။

ပြန်လာမယ်ဆိုတာ အာမခံချက်တစ်ခုလို
မြေမြှုပ်ဗုံးတစ်လုံးပေါ်
ခြေတစ်ဘက် နင်းထားမိသလိုပါပဲ
မိခင်ရဲ့ ရင်ခွင်ဆိုတာဟာလည်း ရင်မြှုပ်ဗုံးတွေနဲ့ပဲပေါ့
ခံစားချက်ကို စနက်တံလို့လည်း ခေါ်ဝေါ်ကြတဲ့
ဘာသာစကားထဲမှာ သရတစ်လုံးသည်ပင်လျင်
ပေါက်ကွဲဖို့ အဆင်သင့်ဖြစ်နေတာ
အခုန်တစ်ခုမှာ လုံခြုံတဲ့ဘဝ ထားရစ်ခဲ့ပါပြီလေ

၂။

နေဝင်ချိန်တွေမှာ
အိမ်မီးဖိုချောင်ထဲက ဟင်းနံ့နွေးနွေး
မျက်စိမှိတ်လိုက်ရင်
ကိုယ့်အိပ်ရာထဲ ကိုယ်အိပ်ခဲ့တဲ့အရာ
မျက်စိဖွင့်လိုက်ရင်
မှောင်ကျလာတော့မယ့် တောင်တန်းပြာ
စိတ်ထဲ ပေါက်ကွဲစေနိုင်တဲ့ အရာတွေကို သတိနဲ့ ရှောင်ရှားရင်း
သွားလမ်းရဲ့ဗုံးကိုလည်း သက်မဲ့လုပ်တတ်နေပြီပေါ့
သားရဲ့ ခြေလှမ်းမှန်တွေနဲ့ ရှင်သန်နေမှုဟာ
အမေ့ဝင်သက်ထွက်သက်တွေမှာ ပဲ့တင်ထပ်နေမှာပါလေ

၃။

ဒီမှာ
တောပန်းရောင်စုံတွေ ဓလေ့အရ အလေ့ကျ
သိပ်လှတာပဲ သိလား အမေ
ငြိမ်းချမ်းစွာ ပွင့်နေတတ်ကြတာကို
သား ဘယ်လိုသင်ယူရမှန်း မသိအောင်ပါပဲ
သဘာဝအလျောက် ပါရမီရင့်သန်လွန်းကြပါတယ်လေ
အမေ့ဘုရားပန်းအိုးအတွက်
ဒီတောင်တန်းကြီးတစ်ခုလုံးကို
ပွေ့ပိုက်ယူလာပေးချင်လိုက်တာလေ
သေခြင်းရနံ့ သင်းပျံ့နေတတ်တာကတော့
သား နှလုံးသွင်းလက်ခံထားတဲ့ ဓမ္မမြတ်ပဲပေါ့ အမေ …

ဇယလ
၂၃ မေ၊ ဏာသိမ်း ‘၂၁

Leave a Reply

Your email address will not be published. Required fields are marked *

You may use these HTML tags and attributes:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>