ကိုယ့်အရိပ်ကို မင်းမြည်းကြည့်ဘူးသလား
မင်းရဲ့အမှောင်ကို ကိုယ်ဆံပင်စည်းတိုင်း ထိနေရသလိုပေါ့
အဖြစ်တွေကို စနည်းနာရင်း ‘ဖြစ်တယ်’ ဆိုတဲ့စကားမှာ
ကိုယ်ဟာကျွဲလူး၊ ဗူးသီးခြောက်ထဲ ဂယောက်ဂယက်
‘ကိုယ်ဟာကိုယ်ဖြစ်တယ်’ ‘မင်းဟာမင်းဖြစ်တယ်’
‘ဒါဟာအချစ်ဖြစ်တယ်’ ဆိုပါစို့
ပင်လယ်မျက်နှာပြင်ပေါ် ဘွားကနဲပေါ်လာတဲ့ တိမ်ထုကြီးဟာ
အချစ်ဖြစ်တယ် ဆိုပါစို့
နိုင်ငံတော်ဟာ တိုင်းပြည်ရဲ့ အဖျားတိုင်းကိရိယာဖြစ်တယ်
ဆိုပါစို့ ကိုယ်ဟာ မင်းနေထိုင်လို့ရတဲ့နေရာဖစ်တယ် ဆိုပါစို့
အမွှေးတိုင်နံ့ ထူပစ်နေတဲ့ ကော်ဇောပေါ် မင်းပဆစ်ဒူးတုပ်
အပြင်တံခါးဝမှာ ကိုယ်ဟာ တစောင်းလဲနေတဲ့ကျောက်ရုပ်ပေါ့
ရွှေအတိနဲ့ပြီးတဲ့ ဆင်းတုတော်ရဲ့အပြုံးဟာ ကြေးဝါဖြစ်တယ်
ဆိုပါစို့ မြူဟာပုဝါဖြစ်တယ် ဆိုပါစို့
သူ့ရှေ့မှာဘာကိုသဲသဲကွဲကွဲ
သူ့နောက်မှာဘာဟာခိုင်ခိုင်မြဲမြဲ
စကားထဲသဲတကျိကျိပါလာတာအတွင်းလေရဲ့ဘယ်သူ့ထံ
ဒေါသနဲ့ဗျာပါဒကိုအသုဘရှုဖြစ်တယ်ဆိုပါစို့
ကိုယ်တို့ဖက်ဖြစ်တယ် နမ်းဖြစ်တယ် နှစ်ကိုယ့်တစ်စိတ်မီးမှာ
ပြာပန်းပွင့်ဖြစ်တယ်ဆိုပါစို့
ရှေးဟောင်းတံတားတစ်စင်းရဲ့အကြွင်းဟာ
ခရစ်မပေါ်မီနှစ် ၃၂၀၀ ကဖြစ်တယ်
သူတို့ဘယ်ကနေဘယ်ကူးဖို့ထောင်စုနှစ်တွေစောင့်ခဲ့သလဲ
အဲဒီတံတားပေါ်မှာမင်းနဲ့ကိုယ်ဟာမျက်နှာချင်းဆိုင်
အကြည့်တစ်ချက်ထဲထိုးသိပ်ထည့်ပြီးကျော်ဖြတ်သွားခဲ့တယ်
ကံကြမ္မာဟာလည်းတံတားတစ်စင်းဖြစ်တယ်ဆိုပါစို့
မင်းဝတ်ပြုနေမှုမှာ နဂါးပွက်အိုင်ကိုယ်ပွက်ပွက်ဖြစ်တယ်ဆိုပါစို့
ဘုန်းကြီးကျောင်းမှာဘေးတိုက်အတူတူ
ချွတ်ထားတဲ့မင်းဖိနပ်နဲ့ကိုယ့်ဖိနပ်ဟာ
တစ်ခုခုတော့ဖြစ်တယ်ဆိုပါစို့
ဇယလ
၂၄ အောက်တိုဘာ ‘၁၇