Music of A Poem

ကဗျာတစ်ပုဒ်ရဲ့ ဂီတ

ကဗျာတစ်ပုဒ်ရဲ့ ဂီတဆိုတာ အသံစနစ်ထက်ပိုပါတယ်။ ကာရန် ၊ နဘေ ၊ ထပ်ကျော့ ၊ နရီ စတဲ့ ကဗျာပုဒ်ရဲ့ အသံဖွဲ့စည်းမှု ပိုင်းဆိုင်ရာထက်မကပိုပါတယ်။

အသံဖွဲ့စည်းမှုက လာတာမဟုတ်ရင် ကဗျာပုဒ်ရဲ့ ဂီတဘယ်ကလာသလဲ။

ကဗျာပုဒ်ထဲက လေသံအပြောင်းကလည်းလာတယ်။ လေသံဆိုတာ ကဗျာရေးသူရဲ့ ရေးနေတဲ့အကြောင်းအရာပေါ် သဘောထားလည်းဖြစ်တယ်။

အကြောင်းအရာ  ၊ နိမိတ်ပုံ အခုန်အကူးဆီကလည်းလာတယ်။ ယုတ္တိဆက်စပ်မှုနဲ့ တွဲချိတ်ထားတာမဟုတ်တဲ့ အာရုံအခုန် အကူးကလာတယ်။

အဆိုတစ်ရပ်နဲ့ တစ်ရပ်အကူးကိုချိန်ကိုက်ထားမှုကလည်းလာတယ်။

ဘယ်ကလာလာ ၊ ဒီဂီတဟာ ကဗျာပုဒ်ရဲ့ ပေါ်လွင်တဲ့ စကားလုံးအနက်အဓိပ္ပါယ်တွေကို စီရင်တယ်။

ဒီဂီတဟာ ဆင်ခြင်ယုတ္တိအသွားနဲ့ ခပ်ကွာကွာနေကောင်းနေပေမယ့် သီးခြားမဟုတ်ပြန်ဘူး။

အတ္ထဗေဒရဲ့ စီရင်မှုနဲ့လည်း မနီးမဝေးမှာ မရောမထွေးပဲရှိပြန်တယ်။

ဒီဂီတရှင်သန်လှုပ်ရှားနေတဲ့ ကဗျာပုဒ်ဖတ်ရတဲ့အခါ ရေးသူရဲ့ စိတ်သဏ္ဍာန်နိုးကြွရှင်သန်လှုပ်ရှားနေမှုကို သက်သေအဖြစ်မြင် နေရ တယ် ၊ အာရုံရနေရတယ်။ ခံစားမှုကို အတွေးနဲ့ ၊ အတွေးကို ခံစားမှုနဲ့ ပူးယှက်စေတယ်။

အချက်အလက်ကမ္ဘာမှာ နေထိုင်ရခြင်းထဲက မိမိရဲ့ ကိုယ်ပိုင် ကမ္ဘာတည်ဆောက်လိုမှုဆန္ဒကို ကြိုးစားပုံဖေါ်ခြင်းထဲကလည်း ဒီဂီတဟာ မယုံသင်္ကာဖြစ်ရလောက်အောင် ၊ သံသယ၀င်ရလောက်အောင် ၊ ယုံကြည်ရခက်ခဲလောက်အောင် လျှပ်တပြက်ပေါ်လွင်လာ တာလည်းဖြစ်တယ်။

ကဗျာပုဒ် ပီပီပြင်ပြင်လာဖို့ စိတ်အလုပ်ရဲ့ ဂီတ

ဘာသာစကားသက်သက်မဟုတ်ဘူး

အာဝဇ္ဇန်းသက်သက်မဟုတ်ဘူး

`ခံစားမှု´ သက်သက်မဟုတ်ဘူး

ကွန်ဆက်ပ်တ်သက်သက်မဟုတ်ဘူး

ဖန်တရာတွေရေးနည်း/ တွေးနည်းသက်သက်မဟုတ်ဘူး

သိမ်မွေ့တဲ့ စိတ်ရဲ့ ဆက်စပ်မှုတွေရဲ့ ထူးခြားရလာဒ်ဖြစ်တယ်

ကဗျာပုဒ်ရဲ့ အသက်ဓါတ်

 ဇေယျာလင်း
ငွေဆောင်ကမ်းခြေဆည်းဆာ
28 – Dec – 13 

Leave a Reply

Your email address will not be published. Required fields are marked *

You may use these HTML tags and attributes:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>