ညအိပ်ယာမဝင်မီ ပထမဆုံးအကြိမ် တစ်လုံးအသောက်အပြီး
မနက်အိပ်ယာနိုးတော့ အံသြကြည်နူးစွာ တွေ့ရှိရပါတယ်
နဂိုအရွယ်ထက် ၈ ဆ ထွားလာတဲ့ သူမရဲ့ ရှယ်သားမြတ်တွေ။
အဲသလိုပဲ၊ လိုသော အရွယ်အစားများ၊ လိုသောဘဝများ
လိုသော ယုံကြည်မှုများ တိုးပွားကြပါစေ။
ဆံပင်၊ သွား၊ အသားအရေ၊ လက်မောင်းကြွက်သား၊ တင်သားတင်းတင်း
အောင်မြင်သော သူများ၏ ပကတိစံချိန်စံညွှန်းအတိုင်း တစ်ပါတ်အတွင်း
မရရှိလျှင် အာမခံချက် ပြန်အမ်းမည်။ ရာဇဝင်အာမခံ။
အားလုံးအစစ်အမှန်။
မိမိတို့ရဲ့ မပြောင်းလဲတဲ့ စေတနာအရင်းခံ။
လိုသောရာထူး၊ လိုသောဝင်ငွေ၊ လိုသော အိမ်၊ ခြံ၊ မြေ၊ ကား၊ ဖုံး။
လူကြီးမင်း၊ အမျိုးကောင်းသမီး များနှင့် မိဘပြည်သူများ ခင်ဗျား
နှလုံး၊ အသည်း၊ အဆုတ်၊ သွေး၊ အရည်ကြည်၊ ကျောက်ကပ်
အင်္ဂါရပ်များအားလုံး စည်းလုံးညီညွတ်စွာ တစ်သမတ်လည်ပတ်ရန်
မိမိတို့တာဝန်အဖြစ် သမိုင်းရေးအရ လုံးဝလိုလားစွာ ခံယူပါသည်။
မိမိတို့ကို ခေါ်ပါ။ မိမိတို့ကို ခိုင်းပါ။
မိမိတို့ကို ချိန်းပါ။ မိမိတို့ကို ချစ်ပါ။
မိမိတို့ကို လုံးဝဥဿုံ ယုံကြည်စိတ်ချထားလိုက်ပါ။
သင့်ဘဝမှာ ဘာလိုနေတာ သင့်ထက် မိမိတို့သိကြတာ
ရာစုနှစ်တစ်ဝက်စာ အတွေ့အကြုံရင့်ကျက်သူတွေပါ။
ကမ္ဘာမှာ စမ်းသပ်ခံနိုင်တဲ့ မိမိတို့ရဲ့ နည်းစနစ်တွေ အမှန်အကန်ပါ။
သက်သေသာဓကတွေအဖြစ် သင့်တစ်ကိုယ်ရည်ဝင့်ကြွားမှုများနှင့်
တိုက်စစ်ပါ။ အားလုံး အစစ်အမှန်။ အတွင်းရန် အပြင်ရန်မရှိ။
ဝေဖန်စရာမရှိ၊ ကြောင့်ကြစရာမရှိ၊ သံသယလုံးဝ ဖြစ်စရာမရှိ။
အခုချက်ခြင်း သင့်ကိုယ်သင် မိမိတို့ထံ အပ်နှံပါ။
အချိန်ပိုဝန်ဆောင်မှုများလည်း အချိန်ပြည့်ပေးနေပါကြောင်း။
ဘာတွေကိုများ အချိန်ကုန်ခံစဉ်းစားနေရသေးလဲကွယ်။
အခုချက်ခြင်းပဲ သင့်ကို မိမိတို့ ပြုပြင်ပြောင်းလဲ ပါရစေ။
သင့်ဘဝတိုးတက်စေဖို့ မိမိတို့လက်ထဲ အခုပဲလာရောက်အပ်ပါလေ။
ပြီး… … တစ်ယောက်စီအတွက် ဧကံမုချရရှိကြမယ့်
ပေါက်စေအမိန့်နဲ့ လုံးဝပေါက်မယ့် ကံစမ်းမဲပြားတွေ။ ။
ဇေယျာလင်း
18 March ’12